View this email in your browser

DOMINYDDWYD mis Medi, wrth gwrs, gan newyddion am farwolaeth sydyn Ei Mawrhydi’r Frenhines Elizabeth II.

Ar ôl teyrnasu am 70 mlynedd – cyfnod hwy nag unrhyw deyrn arall yn hanes Prydain – nid oedd unrhyw amheuaeth ynglŷn â’i hymroddiad a’i hymrwymiad. Parhaf i gydymdeimlo’n ddwys â’r Teulu Brenhinol ar yr adeg hon.

Roedd mis Medi hefyd yn garreg filltir bwysig i Heddlu Dyfed-Powys, wrth groesawu ei swyddogion dan hyfforddiant newydd. Am y tro cyntaf, bydd ganddynt y dewis i gwblhau eu hastudiaethau drwy gyfrwng y Gymraeg.

Mae ymweld â’r cymunedau rwy’n eu gwasanaethu’n rhan bwysig o’m swydd. Yr oeddwn yn ddiolchgar o gael fy ngwahodd i siarad â grŵp Merched y Wawr Caerfyrddin ar 14 Medi, a chwrdd ag aelodau o Glwb Pobl Fyddar Llanelli a’r Cynghorwyr Suzy Curry, Andre McPherson a John Prosser ar 29 Medi.

Yr wyf wrth fy modd yn gweld sefydliadau’n cymryd ymagweddau creadigol tuag at ddatrys materion lleol. Mae Galeri VC yn Sir Benfro’n enghraifft arbennig o hyn, ac mae rhaglen pêl droed ieuenctid lleol yr uwch gynghrair yn un arall. Darllenwch mwy am y prosiectau gwych hyn isod.

Diolch ichi unwaith yn rhagor am gymryd yr amser i ddarllen fy mwletin. Mae croeso ichi ei rannu’n ehangach, ac os oes gennych unrhyw gwestiynau, cewch gysylltu â’m swyddfa drwy glicio yma.

Diolch yn fawr,

Dafydd Llywelyn

Comisiynydd Heddlu a Throseddu

Croeso i’r swyddogion cyntaf i dderbyn hyfforddiant yr heddlu yn Gymraeg

Y MIS hwn, croesawyd y garfan gyntaf o swyddogion Heddlu dan hyfforddiant a fydd yn medru dewis ymgymryd â’u taith ddysgu drwy gyfrwng y Gymraeg.

Mae Heddlu Dyfed-Powys yn cydweithio â’r Coleg Cymraeg Cenedlaethol a Phrifysgol De Cymru er mwyn cynyddu’r cyfleoedd ar gyfer recriwtiaid Cymraeg eu hiaith, gan eu galluogi i gwblhau gymaint ag y mynnant o’r Fframwaith Cymwysterau Addysg Plismona yn Gymraeg.

Cymraeg yw iaith gyntaf canran fawr o’r boblogaeth yma yn ardal Dyfed-Powys, ac mae dyletswydd arnom i ddarparu gwasanaeth dwyieithog a sicrhau bod gan ein staff y sgiliau gofynnol i gyfathrebu â’r cyhoedd yn hyderus yn Gymraeg a Saesneg.

Rwy’n ddiolchgar iawn i’r Coleg Cymraeg Cenedlaethol am roi arweiniad a chymorth inni yn ystod ein cyfnodau cynllunio i ddatblygu darpariaeth cyfrwng Cymraeg o fewn rhaglenni hyfforddi swyddogion yr heddlu, ac am gefnogi gweledigaeth y Prif Gwnstabl Dr Richard Lewis a minnau.

YN DDIWEDDAR, cwrddais â Paul Saunders, Beryl Jones, Kati Ferensczi a Kaz Jefferies o Glwb Pobl Fyddar Llanelli er mwyn gweld y gwelliannau sy’n cael eu gwneud i’w hadeilad.

Mae gwaith adeiladu’n cael ei gynnal yn eu canolfan ar Heol Newydd gan Willmot Dixon, y cwmni sy’n gyfrifol am yr hwb plismona a’r ddalfa newydd £15 miliwn yn ardal Dafen.

Fel rhan o’i gytundeb gyda Heddlu Dyfed-Powys, rhaid i Willmot Dixon sicrhau ei fod yn rhoi yn ôl i’r gymuned drwy weithgareddau megis cynnig hyfforddiant a darparu cymorth ymarferol – megis deunyddiau a llafur – i sefydliadau yn yr ardal leol.

Un o’r rhai a gafodd ei enwebu i elwa o’r cytundeb hwn yw Clwb Pobl Fyddar Llanelli, sydd hefyd yn cael ei adnabod fel Canolfan Llanelli ar gyfer Pobl Fyddar. Mae’r ganolfan yn cynnig cyfeillgarwch a chymorth i bobl o bob oed sy’n fyddar/wedi’u byddaru. Mae’n cynnal cyrsiau Iaith Arwyddion Prydain, ac mae ganddi ei heglwys ei hun, hyd yn oed!

Cawsom ein tywys o gwmpas yr adeilad gan yr aelodau, a esboniodd y math o waith maen nhw’n ei wneud, a hynny ar sail gwbl wirfoddol, gan ddibynnu’n llwyr ar ariannu/grantiau. Yr oedd hefyd yn amhrisiadwy dysgu am anghenion pobl fyddar neu bobl sydd wedi’u byddaru wrth ryngweithio â’r heddlu, a’u profiad o drosedd neu adrodd am ddigwyddiadau.

Elusen gelf yn cynllunio canolfan ar gyfer y gymuned gyfan

CEFAIS fy ysbrydoli gan fy ymweliad â chanolfan newydd Galeri VC yn Noc Penfro wythnos diwethaf.

Wedi’i sefydlu gan y cyn-filwr Barry John MBE yn 2013, mae Galeri VC yn defnyddio celf a phrosiectau creadigol eraill i ymgysylltu â chyn-filwyr ac aelodau eraill o’r gymuned. Ar hyd y ffordd, maent yn helpu i fynd i’r afael ag unigrwydd ac ynysu cymdeithasol, ac yn cefnogi pobl o bob oed a gallu, gan gynnwys unigolion ag anableddau corfforol neu feddyliol.

Yn gynharach eleni, symudodd stiwdio’r elusen yn Noc Penfro i safle mwy o faint yn yr hen ysgol gynradd ar Ffordd Britannia. Rhoddodd Barry a Chris Paling, cydlynydd gwirfoddolwyr, daith imi o gwmpas y safle, gan rannu eu cynlluniau uchelgeisiol i drawsnewid y safle’n ganolfan ar gyfer y gymuned gyfan.

Cewch ragor o wybodaeth am etifeddiaeth yr elusen fan hyn, a chewch ddarllen am newyddion a digwyddiadau diweddaraf y ganolfan ar Ffordd Britannia fan hyn.

Prosiect pêl-droed yn ysbrydoli plant

Oeddech chi’n gwybod bod timoedd plismona lleol yr Heddlu nawr ar Facebook?

DILYNWCH eu tudalennau er mwyn cael gwybodaeth am gymorthfeydd a digwyddiadau a drefnir gan eich Tîm Plismona Bro lleol, cael cyngor am ddiogelwch, holi cwestiynau a mwy. Cliciwch y dolenni isod i gael eich tywys i dudalen eich tîm plismona agosaf.