View this email in your browser

Croeso i rifyn diweddaraf fy mwletin sy’n amlygu rhai o’r gweithgareddau y bûm yn ymwneud â nhw yn ystod mis Ebrill.

Dros yr ychydig fisoedd diwethaf rwyf wedi bod yn ffodus i allu mynd allan i gymunedau ar draws ardal yr Heddlu i ymgysylltu â thrigolion, partneriaid a chynrychiolwyr cymunedol, a doedd mis Ebrill ddim yn eithriad.

Roedd fy Niwrnod Ymgysylltu Cymunedol yng Ngheredigion yn ystod y mis, yn dilyn Diwrnod Ymgysylltu Cymunedol gwych a gefais yn Llanelli ddiwedd mis Mawrth. Yn ystod fy niwrnod yn Llanelli cyfarfûm â Chlerc Cyngor Gwledig Llanelli i glywed am brosiect Hwb Llwynhendy, cyn ymweld â Chapel Siloah yn Seaside i drafod cynlluniau i adnewyddu’r Capel yn gyfleuster cymunedol a fydd â phwyslais arbennig ar blant a phobl ifanc.

Roedd fy Niwrnod Ymgysylltu Cymunedol Ceredigion yn Aberystwyth cyfarfûm â nifer o bartneriaid allweddol, darparwyr gwasanaethau, ac aelodau o’r cyhoedd, a gallwch ddarllen amdanynt isod.

Braf oedd bod allan yn Aberystwyth, a byddaf yn dychwelyd i’r dref ar sawl achlysur yn ystod mis Mehefin eleni, pan fyddwn yn croesawu’r Angel Cyllell / Knife Angel yn ôl i ardal yr Heddlu, sef cerflun trawiadol iawn wedi’i wneud o dros 100,000 o gyllyll.

Llwyddais i groesawu’r Knife Angel i’r Drenewydd, Powys yn 2020, ar gyfer ei hymweliad cyntaf â Chymru. Un o negeseuon allweddol y Knife Angel yw atal trosedd, ochr yn ochr â negeseuon gwrth-drais pwysig.

Drwy gydol mis Mehefin, bydd fy nhîm yn gweithio ochr yn ochr â phartneriaid i gyflwyno rhaglen ymgysylltu yn seiliedig ar y negeseuon allweddol hyn. Os hoffech gymryd rhan yn yr ymweliad hwn ar gyfer mis Mehefin, cysylltwch â'm swyddfa ar e-bost yn ystod mis Mai.

Diolch unwaith eto am gymryd amser i ddarllen fy mwletin. Mae croeso i chi rannu'n ehangach, ac os oes gennych unrhyw gwestiynau, mae croeso i chi gysylltu â'm Swyddfa.

Diolch yn fawr,

Dafydd Llywelyn

Comisiynydd Heddlu a Throsedd

Diwrnod Ymgysylltu Cymunedol Ceredigion

Ar y 13eg o Ebrill ymwelais â Cheredigion fel rhan o Ddiwrnod Ymgysylltu Cymunedol arall lle cyfarfûm â nifer o bartneriaid allweddol, darparwyr gwasanaethau, ac aelodau’r cyhoedd.

Yn ystod y dydd, bûm yn ymweld â Phrifysgol Aberystwyth i arsylwi a phrofi dyfais rhithiol y maent wedi’i greu o amgylch cam-drin domestig, ac yna ymweliad â Chanolfan Gyfiawnder Aberystwyth i ymweld â’r Llys Tystion cyn-treial yn ogystal â chwrdd â rhai o’r staff sy’n cynnig cymorth i helpu tystion i roi’r dystiolaeth orau.

Yn ogystal ag ymweld â rhai o’r Gasanaethau a Gomisiynir gennyf, DDAS, sy’n darparu gwasanaeth cymorth camddefnyddio sylweddau i oedolion, a New Pathways, sy’n darparu gwasanaethau cymorth mewn argyfwng i ddioddefwyr trais a cham-drin rhywiol, fe ymwelais ag eiddo a gynigir drwy fy nghynllun peilot tai y cynllun Rheoli Troseddwyr Integredig (Integrated Offender Management) yng Ngheredigion. – prosiect sy’n darparu cymorth adleol brys hanfodol i droseddwyr.

Sicrhau Cyllid i dargedu Trais yn Erbyn Menywod a Merched a Diogelwch Cymunedol mewn mannau lle mae economi'r nos yn fwyaf poblogaidd

Roeddwn yn falch o gyhoeddi ym mis Ebrill fy mod wedi llwyddo i sicrhau cyllid ychwanegol o gronfa Strydoedd Mwy Diogel (Safer Streets) y Swyddfa Gartref i fynd i’r afael â thrais yn erbyn menywod a merched (VAWG) a Diogelwch Cymunedol mewn pedair ardal yn Nyfed-Powys.

Mae cyfanswm o £45,000 o gyllid ychwanegol wedi'i sicrhau i gynyddu diogelwch menywod a merched mewn mannau economi nos prysur yn arbennig.

Bydd y cyllid yn mynd tuag at brynu citiau diogelwch merched, Mannau Diogel Dros Dro cymunedol a Hyfforddiant ar gyfer Busnesau Trwyddedig.

Rwyf wedi tynnu sylw yn fy Nghynllun Heddlu a Throseddu newydd at yr angen i ni leihau trais yn erbyn menywod a merched wrth inni roi blaenoriaeth i atal niwed i unigolion a chymunedau Dyfed-Powys, a chroesawaf y newyddion am y cyllid ychwanegol hwn sydd wedi’i sicrhau drwy fy Swyddfa.

Rhoi llais i ddioddefwyr i ddylanwadu ar wasanaethau plismona lleol

Trwy waith Fforwm Ymgysylltu â Dioddefwyr Dyfed-Powys, rwyf i a Heddlu Dyfed-Powys wedi rhoi llais i ddioddefwyr, drwy weithio’n agos gyda rhai o’i aelodau i gynhyrchu fideo a fydd yn cael ei ymgorffori yn hyfforddiant Heddlu Dyfed-Powys.

Cafodd aelodau'r Fforwm Ymgysylltu â Dioddefwyr eu cyfweld am eu profiadau gyda Heddlu Dyfed-Powys. Rhoddodd pob un adborth ar yr hyn aeth yn dda a'r hyn nad aeth yn dda, yn ogystal â'r cyngor y byddent yn ei roi i swyddogion sy'n delio ag achos tebyg i'w un nhw, a sut mae eu profiad wedi effeithio ar y ffordd y maent yn debygol o ryngweithio â'r Heddlu yn y dyfodol.

Mae mor bwysig bod dioddefwyr a goroeswyr yn cael y cymorth sydd ei angen arnynt, a bod eu profiadau personol yn cael eu clywed er mwyn dylanwadu, hysbysu a helpu i wella gwasanaethau heddlu lleol.

Bydd y fideo hwn yn helpu i sicrhau bod swyddogion a staff yr heddlu yn cael persbectif bywyd go iawn o farn dioddefwyr am y gwasanaeth plismona.

£15.7m ychwanegol i Gomisiynwyr Heddlu a Throseddu ar gyfer Gwasanaethau Cymorth Cam-drin Domestig a Thrais Rhywiol

Yn ystod mis Ebrill, cadarnhaodd y Weinyddiaeth Gyfiawnder fod Comisiynwyr Heddlu a Throseddu ledled Cymru a Lloegr yn gallu gwneud cais am £15.7miliwn ychwanegol ar gyfer gwasanaethau sy’n cefnogi’r rhai sydd wedi profi cam-drin domestig (DA) neu drais rhywiol (SV) a £3.75 miliwn ar gyfer rolau Ymgynghorwyr Annibynnol ar Drais Rhywiol a Domestig.

Er mwyn cael mynediad at y cyllid, roedd yn ofynnol i Gomisiynwyr yr Heddlu a Throseddu gwblhau asesiadau o anghenion a fydd yn rhoi'r darlun diweddaraf i'r Weinyddiaeth Gyfiawnder o angen lleol. O ganlyniad, galwais ar bartneriaid a sefydliadau allweddol sy’n darparu gwasanaethau cymorth i ddioddefwyr SV neu gam-drin domestig yn ardal Dyfed-Powys i gysylltu â’m Swyddfa i gael rhagor o fanylion ac arweiniad.

Mae Cam-drin Domestig a Thrais Rhywiol yn fater sy’n fwy perthnasol nawr nag erioed o’r blaen, ac yn un y mae’n rhaid inni weithredu’n gyflym i fynd i’r afael ag ef.

Mae angen inni sicrhau ein bod yn gwneud popeth o fewn ein gallu i alluogi mynediad at y cymorth a’r gefnogaeth gywir i bob dioddefwr.