View this email in your browser

Roedd mis Chwefror yn fis prysur arall, gan arwain at un o uchafbwyntiau’r flwyddyn i mi fy hun, sef fy Nghynhadledd Gŵyl Dewi flynyddol, a gynhelir yn ystod wythnos gyntaf mis Mawrth.

Eleni, canolbwynt y Gynhadledd oedd Ymddygiad Gwrthgymdeithasol (YGG) a all gael effaith aruthrol ar ei ddioddefwyr ac, mewn rhai achosion, y gymuned ehangach. Yn fy Nghynllun Heddlu a Throseddu newydd rwyf wedi tynnu sylw at atal niwed a achosir gan drosedd ac ymddygiad gwrthgymdeithasol fel un o fy mlaenoriaethau.

Gallwch ddarllen mwy am y Gynhadledd yma. Hoffwn achub ar y cyfle hwn i ddiolch unwaith eto i’m holl siaradwyr gwadd, yn ogystal â phawb a fynychodd yn bersonol ym Mhencadlys yr Heddlu ac ar-lein o bob rhan o Gymru a Lloegr. Roedd yn ddigwyddiad llwyddiannus, ac rwy’n edrych ymlaen yn barod at y flwyddyn nesaf.

Wrth i’r cyfyngiadau pandemig leddfu, mae’n wych bod allan yn ymgysylltu’n bersonol â’n cymunedau unwaith eto. Yn ystod yr ychydig wythnosau diwethaf, rwyf wedi cael y cyfle i ymweld â Safle Adeiladu ein Dalfa a’n Hwb Plismona newydd yn Sir Gaerfyrddin, yn ogystal â De Powys ar gyfer Diwrnod Ymgysylltu â’r Gymuned, y gallwch ddarllen amdano isod.

Diolch unwaith eto am gymryd amser i ddarllen fy mwletin. Mae croeso i chi rannu'n ehangach, ac os oes gennych unrhyw gwestiynau, mae croeso i chi gysylltu â'm Swyddfa ar ebost.

Diolch yn fawr,

Dafydd Llywelyn

Comisiynydd Heddlu a Throsedd

Diwrnod Ymgysylltu Cymunedol yn Ne Powys

Ddydd Llun 21 Chwefror, ymwelais â Thalgarth, y Gelli Gandryll ac Aberhonddu fel rhan o Ddiwrnod Ymgysylltu Cymunedol yn Ne Powys lle cefais gyfle i drafod agweddau ar fy Nghynllun Heddlu a Throseddu newydd ar gyfer Dyfed-Powys gyda chynrychiolwyr cymunedol lleol.

Yn ystod y dydd, cyfarfûm â chynrychiolwyr cymunedol yn Nhalgarth, Y Gelli Gandryll ac Aberhonddu. Ar y cyfan, roedd yn ddiwrnod ymgysylltu’n un cadarnhaol iawn. Roedd yr adborth a gefais yn gadarnhaol, ac roedd yn wych clywed am effaith ein Tîm Plismona Cymunedol yn yr ardaloedd hyn.

Dathlu 15 mlwyddiant rhaglen PL Kicks yr Uwch-Gynghrair

Fis diwethaf cefais gyfle i fod yn rhan o ddathliad 15 mlynedd rhaglen Kicks yr Uwch Gynghrair, gyda’r Uwch Gynghrair yn arddangos yr effaith y mae’r fenter yn ei chael ar gymunedau lleol trwy gyfres o fideos a ryddhawyd yn ystod yr wythnos hon.

I ddathlu’r fenter, cefais wahoddiad i gymryd rhan yn y fideo hyrwyddo gyda’r gynghrair, lle cyflwynais gerdyn ‘Local Legend’ o’r Uwch Gynghrair i Harri o Seaside, Llanelli.

Nod rhaglen PL Kicks yw defnyddio pêl-droed a chwaraeon yn gyffredinol i ysbrydoli plant a phobl ifanc, a dod â chymunedau at ei gilydd.

Dros y ddwy flynedd ddiwethaf, rwyf wedi comisiynu Sefydliad Clwb Pêl-droed Dinas Abertawe i gynnal sesiynau rhad ac am ddim mewn dwy ardal o fewn ardal yr Heddlu, yn Seaside Llanelli, a Doc Penfro, gyda channoedd o blant a phobl ifanc yn mynychu bob wythnos.

Yn dilyn eu llwyddiant yn y ddwy ardal, ym mis Medi 2021, estynnais y rhaglen am dair blynedd arall yn Seaside Llanelli a Doc Penfro o dan gytundeb newydd, a chyflwynais hefyd i blant a phobl ifanc mewn tair ardal newydd, sef Aberystwyth, y Drenewydd, a Chaerfyrddin.

Roedd yn wych bod yn rhan o’r dathliadau, a hoffwn longyfarch yr Uwch Gynghrair ar lwyddiant eu menter Kicks a’r effaith gadarnhaol y mae’r rhaglen yn ei chael ar gymunedau.

Ymweliad a Safle Adeiladu Ystafell Ddalfa a Hwb Plismona newydd Sir Gaerfyrddin

Ddydd Iau, 24 Chwefror, ymwelais â Dafen, Llanelli i weld safle’r Ddalfa a’r Hwb Plismona newydd yn Sir Gaerfyrddin wrth i waith adeiladu ddechrau ar yr adeilad newydd.

Rhoddwyd caniatâd cynllunio i ni gan Gyngor Sir Caerfyrddin yn ôl ym mis Ebrill 2021 ar gyfer y datblygiad arfaethedig, sydd i fod yn adeiladwaith cynaliadwy uchelgeisiol, gyda sgôr rhagoriaeth BREEAM.

Fodd bynnag, roedd y caniatâd cynllunio yn cynnwys nifer o amodau yr oedd yn rhaid eu bodloni cyn y gallai gwaith adeiladu ddechrau.

Mae Wilmott Dixon, sef y Contractwr Adeiladu, wedi bod ar y safle ers yr hydref yn paratoi ar gyfer y camau adeiladu cyntaf, gyda chynnydd penodol yn dechrau ar y datblygiad, y bwriedir ei gwblhau erbyn Mai 2023.

Mae hwn yn fuddsoddiad mawr i ni a fydd yn gweld canolfan blismona uchelgeisiol, modern, cynaliadwy ac addas i’r diben a dalfa a fydd yn bodloni anghenion a disgwyliadau plismona modern ac rwy’n falch o gadarnhau bod gwaith adeiladu wedi dechrau’n ddiweddar.

Rwyf wedi gweithio’n galed iawn gyda phartneriaid dros y blynyddoedd diwethaf i sicrhau ein bod yn cyrraedd y sefyllfa hon ac roedd yn wych bod ar y safle yn Nafen i weld y cynnydd sy’n cael ei wneud gan y cwmni adeiladu.