View this email in your browser

Croeso i rifyn diweddaraf fy mwletin sy’n tynnu sylw at rai o’r gweithgareddau y bum i a’r Swyddfa yn ymwneud â nhw yn ystod mis Awst.

Wedi’r holl weithgareddau ymgysylltu prysur yn y Sioe Frenhinol ym mis Gorffennaf, braf oedd ymweld â Thregaron yng Ngheredigion i fynychu’r Eisteddfod Genedlaethol a oedd yn cael ei chynnal yn y dref o 30 Gorffennaf tan 6 Awst. Bu staff o fy Swyddfa yn brysur drwy gydol yr wythnos, yn ymgysylltu â’r cyhoedd, ac yn hyrwyddo ein harolwg cyhoeddus a’n harolwg ieuenctid.

Yn ystod yr wythnos, cyfarfûm hefyd ag Ysgrifennydd Gwladol Cymru, y Gwir Anrh. Robert Buckland i drafod materion plismona, a chyhoeddi partneriaeth newydd rhwng yr Heddlu a’r Coleg Cymraeg Cenedlaethol i gynyddu’r cyfleoedd i recriwtiaid newydd sy’n siarad Cymraeg ymgymryd â chymaint o’r hyfforddiant yn y Gymraeg â phosibl. Gallwch ddarllen mwy am y datblygiad cyffrous hwn isod.

Roeddwn hefyd yn westai ar raglen Pawb a’i Farn ar S4C a recordiwyd o faes yr Eisteddfod yn Nhregaron, lle buom yn trafod yr heriau sy’n wynebu cymunedau gwledig Cymru. Bu’n wythnos wych, a hoffwn longyfarch y trefnwyr am ŵyl lwyddiannus iawn.

Bu staff o fy Swyddfa yn Sioe Sir Benfro yn Hwlffordd hefyd y mis hwn, ac roedd yn wych cael y sioe yn ôl yn dilyn gorfod gohirio’r Sioe ar eu ffurf arferol dros y ddwy flynedd ddiwethaf oherwydd pandemig Covid-19.

Cyhoeddais fy Adroddiad Blynyddol ar gyfer 2020-21 yn gynharach y mis hwn, ac roeddwn yn falch o weld bod y datblygiadau amgylcheddol a chynaliadwyedd diweddar yr ydym wedi’u gwneud o fewn Dyfed-Powys yn cael eu cydnabod gan Gymdeithas Comisiynwyr yr Heddlu a Throseddu fel enghreifftiau o arferion da, yn eu Hadroddiad InFocus.

Diolch unwaith eto am gymryd amser i ddarllen fy mwletin. Mae croeso i chi rannu'n ehangach, ac os oes gennych unrhyw gwestiynau, mae croeso i chi gysylltu â'm Swyddfa.

Diolch yn fawr,

Dafydd Llywelyn

Comisiynydd Heddlu a Throseddu

Cyhoeddi darpariaeth hyfforddiant Cymraeg newydd cyffrous

Roedd yn falch o gyhoeddi, yn Eisteddfod Genedlaethol Ceredigion y mis hwn, mai’r swyddogion dan hyfforddiant newydd sy’n dechrau ar eu hyfforddiant drwy’r Fframwaith Cymwysterau Addysg Plismona (PEQF) ym mis Medi 2022 fydd y gyfran gyntaf i allu cyflawni cymaint o’u taith fel myfyriwr drwy gyfrwng y Gymraeg â phosibl, os ydynt yn dymuno gwneud hynny.

Mae Heddlu Dyfed-Powys yn cydweithio â’r Coleg Cymraeg Cenedlaethol a Phrifysgol De Cymru i gynyddu’r cyfleoedd i recriwtiaid newydd sy’n siarad Cymraeg ymgymryd â chymaint o’r hyfforddiant â phosibl yn Gymraeg.

Mae canran uchel o boblogaeth ardal Dyfed-Powys yn siaradwyr Cymraeg iaith gyntaf, ac felly mae dyletswydd arnom i sicrhau ein bod yn gallu darparu gwasanaeth dwyieithog, a bod gennym weithlu sydd â’r sgiliau i gyfathrebu â’r cyhoedd yn hyderus yn y Gymraeg a'r Saesneg.

Rwy’n ddiolchgar iawn i’r Coleg Cymraeg Cenedlaethol am roi arweiniad a chefnogaeth i ni yn ein cyfnodau cynllunio i ddatblygu darpariaeth cyfrwng Cymraeg o fewn rhaglenni hyfforddi swyddogion heddlu, ac am gefnogi gweledigaeth y Prif Gwnstabl a minnau.

Ymdrechu i gwrdd â heriau newid hinsawdd

Yr wyf yn falch o weld bod rhai o’r datblygiadau cynaliadwyedd ac amgylcheddol yr ydym wedi’u gwneud yn Nyfed-Powys yn ddiweddar, wedi’u cydnabod gan Gymdeithas Comisiynwyr yr Heddlu a Throseddu fel enghreifftiau o arferion da yn eu hadroddiad In-Focus diweddar.

Yma yn Nyfed-Powys, ein nod yw datblygu a gwreiddio diwylliant arloesol o ran cynaliadwyedd, drwy leihau ein hôl troed carbon a sicrhau bod ein hystad, fflyd cerbydau, cyflenwadau, prosesau a gweithdrefnau gwasanaethau yn amgylcheddol gyfrifol.

Mae'r adroddiad yn tynnu sylw at y gwaith y mae Comisiynwyr yr Heddlu a Throseddu yn ei wneud ledled Cymru a Lloegr, gan gynnwys yma yn Nyfed-Powys, i leihau'r ôl troed carbon yn eu hardal heddlu a sicrhau dyfodol cynaliadwy. Yn benodol, mae adroddiad In Focus yn amlygu;

• Fy ymrymiad i fuddsoddi mewn 11 o geir trydan ar gyfer Timau Plismona Bro’r heddlu, gyda’r nod o dorri allyriadau carbon a gweithio tuag at ddyfodol mwy cynaliadwy.

• Y gronfa o £880,000 a sircrhawyd gennyf gan Salix Finance y Llywodraeth, i ddatblygu Heddlu Dyfed-Powys ymhellach i fod yn sefydliad ecogyfeillgar a chefnogi’r camau gweithredu i leihau effaith newid yn yr hinsawdd.

• Cynllun Talu’n Ôl i’r Gymuned Dyfed-Powys sydd ar hyn o bryd yn gweithio tua 1,000 o oriau’r wythnos ar gyfartaledd yn y gymuned lle mae unigolion addas ar brawf yn cael eu rhoi mewn siopau elusen, a’r Ymddiriedolaeth Genedlaethol i gyflawni eu gofynion gwaith di-dâl. Mae hyn wedi meithrin perthnasoedd gwaith cryf gyda siopau elusen a sefydliadau trydydd sector eraill ledled ardal Dyfed-Powys.

Cyhoeddi Adroddiad Blynyddol 2021-22

Mae 2021-22 wedi bod yn flwyddyn gynhyrchiol, gyda phenodiad Prif Gwnstabl newydd ar gyfer Heddlu Dyfed-Powys, datblygu a lansio fy Nghynllun Heddlu a Throseddu newydd ar gyfer 2021-25 a’r gwaith partneriaeth parhaus gyda gwasanaethau allweddol, rhanddeiliaid a phartneriaid ar lefel leol a rhanbarthol.

Y mis hwn, cyhoeddais fy Adroddiad Blynyddol 2021-2022, sy’n rhoi tystiolaeth o’r gwaith a wnaed gennyf i a’r Swyddfa, a phartneriaid yn ystod blwyddyn ariannol 2021-2022.

Mae’r Adroddiad Blynyddol yn myfyrio ar y gwaith a wnaed i gyflawni fy mlaenoriaethau: bod dioddefwyr yn cael eu cefnogi, bod niwed yn cael ei atal a bod ein system gyfiawnder yn fwy effeithiol, yn ogystal â sut rwyf wedi parhau i hyrwyddo cydweithredu, atebolrwydd, cynaliadwyedd ac ymgysylltu.