View this email in your browser

Yn dilyn cyfnod prysur iawn dros y Nadolig, gall mis Ionawr fod yn amser tawel i rai, ond nid oedd hynny’n wir i fy nhîm a minnau, gyda llawer o weithgareddau’n cael eu cynnal drwy gydol y mis. Dim yn bwysicach na’r ddau gyfarfod Bwrdd Plismona lle daliais y Prif Gwnstabl newydd, Dr Richard Lewis, a’i Uwch Swyddogion i gyfrif am y tro cyntaf. Cyflwynais hefyd fy nghynnig Praesept yr Heddlu i Banel Heddlu a Throseddu Dyfed-Powys ddiwedd y mis, lle cafwyd cefnogaeth unfrydol at gynnydd o 5.3% ar gyfer 2022/23. Gallwch ddarllen mwy am y cynnig a gyflwynwyd i’r Panel isod. Rwy’n ddiolchgar iddynt am eu cefnogaeth barhaus.

Gallwch hefyd ddarllen isod am sedd wag ar ein Cydbwyllgor Archwilio ar hyn o bryd, a gwybodaeth am geisiadau llwyddiannus am gyllid gan sefydliadau ac elusennau yn Nyfed-Powys sy'n darparu gwasanaethau i blant sydd wedi cael profiadau niweidiol yn ystod plentyndod.

Hoffwn hefyd eich atgoffa o gyhoeddiad fy Nghynllun Heddlu a Throseddu 2021 - 2025 newydd, a gyhoeddwyd ym mis Rhagfyr, a gallwch ddarllen gwybodaeth amdano yma. Fel y soniwyd yn fy mwletin diwethaf, byddwn yn croesawu unrhyw gyfle i drafod fy ngweledigaeth a’m blaenoriaethau gyda phreswylwyr a phartneriaid, felly cysylltwch â’m Swyddfa os hoffech gael gwybod am unrhyw gyfleoedd i ymgysylltu.

Hoffwn achub ar y cyfle hwn i ddiolch i bawb a roddodd o’u hamser i ymateb i’r arolwg ‘Ydych chi’n teimlo’n ddiogel yn eich ardal leol?’. Cawsom gyfradd ymateb dda, ac mae staff yn fy Swyddfa ar hyn o bryd yn dadansoddi eich ymatebion a’r adborth a rannwyd gennych. Os gwnaethoch nodi yn eich arolwg yr hoffech dderbyn copi o'r canlyniadau a chael gwybod mwy am y camau a gymerwyd o ganlyniad i'ch adborth, byddwn mewn cysylltiad.

Diolch unwaith eto am gymryd amser i ddarllen fy mwletin. Mae croeso i chi rannu'n ehangach, ac os oes gennych unrhyw gwestiynau, mae croeso i chi gysylltu â'm Swyddfa yma.

Diolch yn fawr,

Dafydd Llywelyn

Comisiynydd Heddlu a Throsedd

Praesept Heddlu 2022.23 i gefnogi blaenoriaethau allweddol

Ar 28 Ionawr 2022, cadarnheais braesept yr heddlu ar gyfer 2022/23 yn dilyn cyfarfod o Banel Heddlu a Throseddu Dyfed-Powys.

Ar ôl proses graffu helaeth, cefnogodd Panel Heddlu a Throseddu Dyfed Powys yn unfrydol fy nghynnig praesept ar gyfer 2022/23 a fydd yn gweld cynnydd o 5.3% sy’n cyfateb i gynnydd misol o £1.22 ar gyfer eiddo Band D.

Wrth osod y praesept, rwy’n ystyried amrywiaeth o ffactorau, gan gynnwys gofyniad adnoddau’r Prif Gwnstabl yn y dyfodol, targedau recriwtio Swyddogion Heddlu, lefel y cronfeydd wrth gefn, gofynion buddsoddi yn y dyfodol ar gyfer seilwaith hanfodol, cynlluniau effeithlonrwydd a chynhyrchiant, yn ogystal ag adborth gan drigolion ardal Dyfed-Powys.

Mae'n ymddangos bod pob blwyddyn yn dod â phwysau a beichiau ariannol ychwanegol ac annisgwyl, ac yn anffodus nid yw 2022/23 yn wahanol. Er gwaethaf cyllid grant ychwanegol i gefnogi recriwtio Swyddogion Heddlu ychwanegol, mae'n amlwg bod y dirwedd ariannol yn parhau i fod yn heriol.

Rwy’n ddiolchgar i aelodau Panel Heddlu a Throseddu Dyfed-Powys am eu cefnogaeth barhaus. Bydd y lefel hon o gyllid yn galluogi Heddlu Dyfed-Powys i ganolbwyntio ar gyflawni fy Nghynllun Heddlu a Throseddu newydd ac i barhau i ddiogelu ein cymunedau lleol dan arweiniad profiadol y Prif Gwnstabl newydd Dr Richard Lewis.

Recriwtio aelodau newydd ar gyfer y Cydbwyllgor Archwilio

Mae fy Swyddfa yn chwilio am aelodau annibynnol newydd i ymuno â'n Cydbwyllgor Archwilio.

Mae'r Cydbwyllgor Archwilio Annibynnol yn rhoi cyngor a sicrwydd annibynnol ar lywodraethu cyffredinol fy Swyddfa a Heddlu Dyfed-Powys.

Bydd y Pwyllgor yn adolygu ac yn craffu ar ddigonolrwydd ac effeithiolrwydd trefniadau rheoli risg, archwilio a rheoli mewnol, a llywodraethu corfforaethol y ddau sefydliad, yn ogystal ag adolygu rheolaeth ariannol ac adrodd.

Mae’r Cydbwyllgor Archwilio yn elfen allweddol o’n trefniadau llywodraethu corfforaethol, ac mae hwn yn gyfle gwych i unrhyw un sydd â diddordeb yn y maes hwn ac a hoffai helpu i graffu ar y ffordd y mae cyllid yr heddlu yn gweithredu.

I ddarganfod mwy am rôl y Pwyllgor a'r cymwyseddau angenrheidiol, dilynwch y ddolen isod.

Cyllid gan Lywodraeth Cymru i sefydliadau yn Nyfed-Powys sy’n darparu cymorth i’r rhai y mae Profiadau Niweidiol yn ystod Plentyndod yn effeithio arnynt

Ym mis Hydref 2021, agorodd Llywodraeth Cymru gynllun grant gwerth £200,000 ar gyfer unigolion a sefydliadau ledled Cymru sy’n cynnal gweithgareddau gyda’r rhai y mae Profiadau Niweidiol yn ystod Plentyndod (ACEs) wedi effeithio arnynt.

Roeddwn yn falch o weld bod pedwar sefydliad yma yn ardal Dyfed-Powys wedi llwyddo i gael cyllid gan Lywodraeth Cymru.

Gall profiadau niweidiol yn ystod plentyndod niweidio ymennydd datblygol plant ac arwain at newidiadau yn y ffordd y maent yn ymateb i straen. Gall niweidio eu systemau imiwnedd mor ddifrifol nes bod yr effeithiau'n ymddangos ddegawdau'n ddiweddarach. Gall ACEs hefyd achosi afiechyd cronig, a salwch meddwl, ac maent wrth wraidd y rhan fwyaf o drais.

Rwy’n hynod falch felly o weld y pedwar sefydliad hyn yn arwain y ffordd yma yn Nyfed-Powys o ran ceisio cefnogi unigolion a theuluoedd drwy gyflwyno gweithgareddau a fydd yn anelu at wella iechyd meddwl a chorfforol, ac annog ein cymunedau i adeiladu eu cryfder a’u cefnogaeth ar y cyd a’i gilydd.

I ddarllen mwy am yr ymgeiswyr llwyddiannus, cliciwch yma.

Ers gwneud y cyhoeddiad am ymgeiswyr llwyddiannus am grant, mae Llywodraeth Cymru wedi cyhoeddi bod rhagor o arian ar gael, ac yn gwahodd ceisiadau pellach.

Nod y cynllun grant yw hybu mentrau sy’n cefnogi unigolion sy’n cael eu magu, neu’n byw mewn cartrefi, lle mae cam-drin domestig neu gamddefnyddio sylweddau, yn ogystal â’r rhai sy’n darparu cymorth ymarferol i deuluoedd i’w helpu i ymdrin â materion fel cyllid teulu, neu rianta i wella gwytnwch.

Mae’r cynllun grant yn gwahodd ceisiadau ar draws tair ffrwd wahanol:

• Sefydliadau sy'n cefnogi merched o gefndiroedd hiliol ac ethnig lleiafrifol.

• Sefydliadau sy'n cefnogi menywod ag anghenion niwro-amrywiaeth

• Sefydliadau sy’n cefnogi menywod a phlant sydd wedi profi cam-drin domestig neu rywiol/trais

Mae’r broses ymgeisio’n cael ei gweinyddu gan ein cydweithwyr yn Swyddfa Comisiynydd Heddlu a Throseddu De Cymru.