View this email in your browser

Croeso i rifyn diweddaraf fy mwletin sy’n amlygu rhai o’r gweithgareddau y bûm yn ymwneud â nhw yn ystod mis Gorffennaf.

Bu’n fis prysur unwaith eto, a’r uchafbwynt i mi, heb os, oedd mynychu’r Sioe Frenhinol yn Llanelwedd. Ar ôl dwy flynedd heb Sioe oherwydd y pandemig Coronafeirws, roedd yn wych gallu mynychu’r Sioe ac ymgysylltu â’n partneriaid o’r diwydiant amaeth a thrigolion ein cymunedau gwledig.

Gallwch ddarllen mwy am ein gweithgareddau ymgysylltu yn y Sioe isod.

Eiliadau allweddol eraill i mi yn ystod mis Gorffennaf oedd;

• Sicrhau £271,000 o gyllid ychwanegol gan y Weinyddiaeth Gyfiawnder a fydd yn mynd tuag at gynyddu a chryfhau gwasanaethau cymorth i ddioddefwyr cam-drin domestig a thrais rhywiol.

• Lansio ymgynghoriad cyhoeddus i gasglu barn y cyhoedd ar faterion plismona a throseddu yn ardal Dyfed-Powys.

• Sicrhau cyllid o bron i £300,000 a fydd yn cyflwyno cyfres o fentrau sy’n anelu at sicrhau strydoedd mwy diogel o fewn trefi a chymunedau ar draws ardal Dyfed-Powys

• Cefnogi Wythnos Ymddygiad Gwrthgymdeithasol

Gallwch ddarllen am yr uchod i gyd isod a thrwy ddilyn y dolenni.

Diolch unwaith eto am gymryd amser i ddarllen fy mwletin. Mae croeso i chi rannu'n ehangach, ac os oes gennych unrhyw gwestiynau, mae croeso i chi gysylltu â'm Swyddfa.

Diolch yn fawr,

Dafydd Llywelyn

Comisiynydd Heddlu a Throseddu

Lansio Arolwg Cyhoeddus fel rhan o waith ymgysylltu â'r cyhoedd yn y Sioe Frenhinol yn Llanfair-ym-Muallt

Yn ystod Sioe Frenhinol Cymru lansiais arolwg cyhoeddus i gasglu barn y cyhoedd ar faterion plismona a throseddu yn ardal Dyfed-Powys.

Mae’r arolwg yn gofyn i’r cyhoedd nodi pa mor ddiogel y maent yn teimlo yn eu hardal, pa gamau y gellir eu cymryd i wella cefnogaeth i ddioddefwyr, atal trosedd a beth maent yn credu y gellir ei wneud i sicrhau bod gennym system cyfiawnder troseddol effeithiol.

Fel Comisiynydd Heddlu a Throseddu Dyfed-Powys, rwyf am sicrhau fy mod yn darparu cyfleoedd i bobl o ystod eang o gefndiroedd amrywiol gael eu clywed, rhannu eu barn a helpu i lunio polisi.

Bydd ymatebion i’r arolwg hwn yn rhoi syniad i mi o ganfyddiad y cyhoedd o blismona yn ein hardal a’r cynnydd a wnaed tuag at y canlyniadau a osodwyd o dan flaenoriaethau Cynllun Heddlu a Throseddu 2021-25.

Byddwn yn ddiolchgar petaech yn cwblhau'r arolwg drwy glicio ar y ddolen isod, a plis rhannwch yn ehangach.

Yn ogystal ag ymgysylltu â’n harolwg cyhoeddus, roedd gennym nifer o weithgareddau eraill yn cael eu cynnal yn y Sioe, gan gynnwys hyrwyddo ein cynllun gwirfoddolwyr, gwasanaethau a gomisiynir, mentrau ymyrraeth ac atal megis partneriaeth PL Kicks gyda Sefydliad CPD Dinas Abertawe.

Cyfarfûm hefyd â chynrychiolwyr o NFU i drafod arolwg troseddau gwledig diweddar a gynhaliwyd gan Brifysgol Aberystwyth ar ein rhan, a mynychais yr ystafell weithrediadau aml-asiantaeth dros dro gyda Grŵp Diogelwch Digwyddiadau Llanfair-ym-Muallt i weld y gwaith gwych yr oedd ein holl bartneriaid yn ymwneud yn ystod yr wythnos i sicrhau diogelwch y cyhoedd.

Dwi’n edrych ymlaen yn barod at sioe’r flwyddyn nesaf!

Cyhoeddi cyllid ychwanegol ar gyfer gwasanaethau cymorth Cam-drin Domestig a Thrais Rhywiol yn Nyfed-Powys

Roeddwn yn falch y mis hwn o gyhoeddi ein bod wedi sicrhau £271,000 o gyllid ychwanegol gan y Weinyddiaeth Gyfiawnder a fydd yn mynd tuag at gynyddu a chryfhau gwasanaethau cymorth i ddioddefwyr cam-drin domestig a thrais rhywiol.

Yn ogystal â’r cyllid hwn, fe wnaethom sicrhau cyllid o £30,882 ar gyfer Cynghorydd Trais Rhywiol Annibynnol Plant.

Mae cefnogi dioddefwyr yn un o dair blaenoriaeth allweddol fy Nghynllun Heddlu a Throseddu ar gyfer 2021-25. Mae Heddlu Dyfed-Powys wedi nodi bod angen cryn dipyn o adnoddau o hyd i fynd i'r afael â'r galw am ddiogelu, yn enwedig Cam-drin Domestig.

O ganlyniad, mae’n gyfrifoldeb arnaf i sicrhau bod gwasanaethau priodol ar gael i ddiwallu anghenion pob dioddefwr, a’n bod yn blaenoriaethu buddsoddiad mewn gwasanaethau i ddioddefwyr troseddau rhywiol difrifol.

Rwy’n falch o fod wedi gallu sicrhau’r cyllid ychwanegol hwn gan y Weinyddiaeth Gyfiawnder, a fydd yn cynyddu ac yn cryfhau’r gwasanaethau cymorth sydd ar gael.

Yn anffodus, dim ond tua 25% o gyfanswm ein cyllid y gofynnwyd amdano a gawsom gan y Weinyddiaeth Gyfiawnder, ac felly bu’n rhaid inni ail-flaenoriaethu ac ailgyfrifo sut y gallwn wneud y gorau o’r hyn a gyflawnwn o ddyraniad cyllid llai.

Fodd bynnag, dylid dal i groesawu unrhyw gynnydd mewn cyllid gan y bydd yn galluogi mynediad pellach at wasanaethau i’r rhai sydd â’r angen mwyaf, felly mae’n bleser gennyf gyhoeddi’r £271,000 ychwanegol hwn o gyllid.

Sicrhau bron i £300k ar gyfer Strydoedd Diogelach ar draws Dyfed-Powys

Y mis hwn cawsom gadarnhad ein bod wedi sicrhau cyllid o bron i £300,000 a fydd yn darparu cyfres o fentrau sy'n anelu at sicrhau strydoedd mwy diogel o fewn trefi a chymunedau ar draws ardal Dyfed-Powys.

Yn benodol, bydd y mentrau’n ceisio mynd i’r afael ag ymddygiad gwrthgymdeithasol a throseddau meddiangar mewn ardaloedd penodol, mynd i’r afael â diogelwch menywod, cynyddu adnoddau atal ac ymyrryd o fewn gwasanaethau cymorth ieuenctid yn Sir Gaerfyrddin, a chynyddu nifer y camerâu teledu cylch cyfyng yn Aberystwyth, Ceredigion.

Cyfanswm y cyllid a sicrhawyd yw £292,741, ac mae’n ychwanegol at y bron i £500,000 sydd eisoes wedi’i sicrhau gan fy Swyddfa drwy geisiadau blaenorol i’r gronfa Strydoedd Mwy Diogel dros y ddwy flynedd diwethaf.

Rwy’n hynod falch o gyhoeddi ein bod wedi llwyddo i sicrhau’r cyllid strydoedd mwy diogel diweddaraf hwn gan y Swyddfa Gartref. Rydym wedi gweithio'n agos gyda'n partneriaid i nodi mentrau penodol a fydd yn ceisio sicrhau bod ein cymunedau a'n strydoedd yn amgylcheddau diogel i drigolion.

Dros y ddwy flynedd ddiwethaf rydym wedi derbyn bron i £800,000 o Gronfa Strydoedd Mwy Diogel y Swyddfa Gartref, sy’n amlygu ein hymrwymiad i wneud strydoedd yn fwy diogel i’r rhai mewn cymunedau lleol, ac i leihau trosedd ac ymddygiad gwrthgymdeithasol, gan gynnwys trais yn erbyn menywod a merched.

Mae atal niwed i unigolion a chymunedau a achosir drwy droseddu, ymddygiad gwrthgymdeithasol a bregusrwydd yn un o’m tair blaenoriaeth allweddol, ac mae’r cyllid strydoedd mwy diogel yn ein cefnogi’n sylweddol i weithio ar y cyd â phartneriaid i fynd i’r afael â’r materion hyn.

Cefnogi Wythnos Ymwybyddiaeth Ymddygiad Gwrthgymdeithasol

Ym mis Gorffennaf ymunais ag ymgyrch genedlaethol i fynd i'r afael ag ymddygiad gwrthgymdeithasol (YGG) a chadw pobl yn Nyfed-Powys yn ddiogel.

Yn rhedeg rhwng 18 a 22 Gorffennaf, nodau Wythnos Ymwybyddiaeth Ymddygiad Gwrthgymdeithasol 2022 oedd annog cymunedau i sefyll yn erbyn YGG a thynnu sylw at y camau gweithredu y gall y rhai sy’n ei brofi.

Wedi’i threfnu gan Resolve, prif sefydliad ymddygiad gwrthgymdeithasol a diogelwch cymunedol y DU, roedd yr wythnos yn cynnwys cyfres o ddigwyddiadau ledled y DU yn cynnwys Cynghorau, Heddluoedd, Cymdeithasau Tai, elusennau, grwpiau cymunedol a chlybiau chwaraeon.

Canfu ymchwil diweddar gan YouGov a gomisiynwyd gan Resolve fod mwy na hanner y bobl (56%) yn credu bod ‘angen gwneud mwy’ i fynd i’r afael ag ymddygiad gwrthgymdeithasol yn eu cymuned. Fodd bynnag, ar ôl iddynt weld neu brofi ymddygiad gwrthgymdeithasol, dywedodd cyfran debyg o'r cyhoedd (57%) nad oeddent wedi rhoi gwybod i neb amdano.

Mae Heddlu Dyfed Powys yn falch o fod y cyntaf yng Nghymru i dderbyn yr ‘Adduned YGG’ gydag ASB Help sy’n dangos ein hymrwymiad i leihau ymddygiad gwrthgymdeithasol a rhoi cyfle i ddioddefwyr ofyn am adolygiad.

Gall ymddygiad gwrthgymdeithasol gael effaith aruthrol ar ei ddioddefwyr ac, mewn rhai achosion, ar y gymuned ehangach. Yn fy Nghynllun Heddlu a Throseddu newydd a gyhoeddwyd yn gynharach eleni, rwyf wedi tynnu sylw at atal niwed a achosir gan droseddu ac ymddygiad gwrthgymdeithasol fel blaenoriaeth.

Mae ymateb effeithiol i ymddygiad gwrthgymdeithasol yn gofyn am arloesi, partneriaeth gref rhwng asiantaethau lleol, a meddylfryd sy'n rhoi dioddefwyr yn gyntaf.

Roedd fy nghynhadledd Gŵyl Dewi flynyddol yn gynharach eleni yn taflu goleuni ar yr her bwysig sy’n ein hwynebu a’r cyfleoedd sydd ar gael i fynd i’r afael ag ymddygiad gwrthgymdeithasol, gyda mewnbwn ar ddull Dyfed-Powys o fynd i’r afael ag ymddygiad gwrthgymdeithasol, a oedd yn cynnwys sut mae’r heddlu’n dal, yn cofnodi ac yn rheoli achosion ymddygiad gwrthgymdeithasol, rôl y cydlynwyr a'r cyfryngwyr, a'r ymyriadau lefel isel a'r dulliau adferol.

Roedd yn ddigwyddiad gwych gyda chydweithwyr o Heddluoedd ledled Cymru a Lloegr yn bresennol i ddysgu mwy am ddull Dyfed-Powys o fynd i’r afael ag YGG.

Achubais ar y cyfle unwaith eto ar ddechrau wythnos Ymwybyddiaeth Ymddygiad Gwrthgymdeithasol, i annog aelodau'r cyhoedd i beidio â dioddef yn dawel os ydynt yn profi ymddygiad gwrthgymdeithasol. Gellir rhoi gwybod am ddigwyddiadau i'r tîm ymddygiad gwrthgymdeithasol mewn Cynghorau lleol, neu i'r Heddlu os yw pobl yn teimlo eu bod mewn perygl uniongyrchol.